نعت مدت سے منتظر ہوں، کوئی نعت بھی بنے۔ نوید اقبال گکھڑ منڈی

[فروغ نعت]

مصرع تو بن رہا ہے مگر بات بھی بنے
مدت سے منتظر ہوں، کوئی نعت بھی بنے
اُنؐ تک حروف جائیں براقِ درود پر
معراج ہو سخن کی، مری رات بھی بنے
اذنِ سفر عطا ہو تو بگڑی بنے مری
بگڑی بنے تو صورتِ حالات بھی بنے
حیران کیوں ہو، کب بنے، مہر و مہ و نجوم!
طیبہ بنا تو اس کے مضافات بھی بنے!!
کتنے دلوں پہ نقش ہیں نعلینِ مصطفیؐ!
حالانکہ ان کا رستہ سماوات بھی بنے
عادت بنا رہا ہوں ثنائے حضورؐ کو
تاکہ مری لحد میں، مرا ساتھ بھی بنے
میں بات کر رہا ہوں رسولِ کریمؐ کی
اللہ چاہتا ہے مری بات بھی بنے
نویداقبال-گکھڑ منڈی