منقبت سیدنا عثمان ذوالنورین رضی اللہ عنہ

[Faaiq Turabi]

وہ چاند ہے کہ چاندنی، وہ گیت ہے کہ نغمگی
وہ صحنِ خارزار میں چمیلیوں سی تازگی

لہو کے گھونٹ پی گیا، وہ شیر بن کے جی گیا
وہ تیرگی کے دشت میں ہے سبز سبز روشنی

اُسی کی شاخ شاخ پر حیاتِ نو نمو پذیر
وہ موت کے دیار میں ہے رسمساتی زندگی

وہ تتلیوں کا غم گُسار، خوشبوؤں کی یادگار
سدا بہار، گل عذار، عطر بار آدمی

مَیں اُس کے سرمئی فسوں میں ڈوب ڈوب سا گیا
وہ شام ہے بہار کی، وہ رات برگ رِیز کی

وہ فجر کی اذان ہے، سکوت کی زبان ہے
وہ لفظ لفظ دل کشی، وہ حرف حرف سر خوشی

کبوتروں کی مجلسوں میں اُس کا ذکرِ خیر ہے
دھنک کا رنگ رنگ اُس کے پیرہن سے مُلتجی

شاعر : فائق تُرابی