نعت نعتِ رسول اللہ صلی اللہ علیہ وآلہ وسلم

[محمد حذیفہ]

قندیلِ محبت بحرِ وفا یا نورِ محمد صلی اللہ
گنجینہِ نورِ ربِّ عُلٰی یا نورِ محمد صلی اللہ

اے مُدرکِ کیفِ جان و جَسَد اے رہبرِ راہِ ربِّ احد
اے خاورِ دھرِ صدق و صفا یا نورِ محمد صلی اللہ

جس وقت نہ تھا کوئی بھی جہاں قائم نہ ہوئے تھے کون و مکاں
اُس وقت بھی تم تھے محوِ ثنا یا نورِ محمد صلی اللہ

دل کو مرے روشن کر دیجے خیرات سے دامن بھر دیجے
پھر مجھ پہ ذرا کردیجے عطا یا نورِ محمد صلی اللہ

تم کشتیِ نوح کی وجہِ اماں داؤد کے ساز میں تم سے فُغاں
بیضا کی ہے قائم تم سے ضیا یا نورِ محمد صلی اللہ

ظلمت کا اندھیرا تم سے چھٹا فیضانِ الٰہی تم سے بٹا
تعریف تری لولاکَ لَما یا نورِ محمد صلی اللہ

منظر وہ بیاں سے باہر ہے لکھنے سے حذیفہ قاصر ہے
جب آپ تھے اور تھا ایک خدا یا نورِ محمد صلی اللہ